شوية كلام لاني اتخنقت

تدوينة بالعامية المصرية اتحدث بهعا عن بعض الاوضاع بمصر الخاصة باليسار المصري وبالحالة المصرية عموماً

شوية كلام عاوز اقولهم لاني اتخنقت من كل اللي بيحصل او من تلت اربع اللي بيحصل في البلد اليومين دول .
ملحوظة المقالة ممكن يبقى فيها كلام يضايقك :

اول حاجة اليساريين اللي بيروحوا يتحالفوا مع الليبراليين ويقولوا عشان ولحدنا واحنا مينفعش نخوض الصراع لوحدنا (ودول في النهاية بيبقوا بتوع انتخابات وان اليسار يوصل من خلال السلطة ) ودول بيبقى عندهم معركة وهمية بيسموها مدنية الدولة ودول بقى بيبقى اغلبهم في التحالف الشعبي الاشتراكي واتحاد الشباب الاشتراكي والتجمع والاشتراكي المصري والشيوعي المصري وبيقعدوا يعيدوا ويزيدوا في ان الصراع دلوقتي على مدنية الدولة مش على ان مصر تبقى اشتراكية ولا لا , واغلبهم او تقريباً كلهم بيبقوا من انصار التحليل والنقد الليبرالي , ومع ذلك بيسموا نفسهم يساريين وبعضهم بيسمي نفسه ماركسي لينيني .
نخش على الصنف التاني وهو ناس شبه دول بالظبط بس مع بعض الاختلافات اسمهم حركة الاشتراكيين الثوريين (منظمة تروتسكية ) وكلهم متمركزين داخل مركز الدراسات الاشتراكية دول بقى بيدعوا إلى التحالف مع الاخوان من اجل تعميق الثورة المصرية .
الناس ديه بقى كوميدية برضه ولا يقلوا كوميديا عن الصنف الاول , حيث ان هؤلاء فاكريين ان الاخوان جزء لا يتجزأ من الثورة المصرية او الحركة الوطنية المصرية وانهم وطنيين وضد الاستغلال وضد الامريكان والصهاينة وانهم رفقاء نضال وثوريين (يعني الكلام ده لو كان لغاية فبراير 2011 كنت اقول مش واخديين بالهم و كنا نلاقي عذر ليهم لكن النهاردة واحنا في يناير 2013 بعد ما الاخوان انفضحوا للكل وبان انهم مع الصهاينة ومع الامريكان وبيدعموهم ومع الاستغلال والاستعمار والصهيونية وده على ما اظن واضح جداً من سياسات الاخوان سواء اللي بيعملوها الان او الموجودة في برامجهم سواء مشروع النهضة ولا برنامج الحرية والعدالة)
والصنف التاني عمال بيتكلم عنهم وكأنهم بقى ناس ضد الصهيونية وضد الامبريالية وبيناضلوا ضدها وضد الملكية الخاصة لوسائل الانتاج وانهم فصيل ثوري وطبعاً ده مش حقيقي بالإضافة إلى ذلك بنلاقي مدح شديد في شباب الاخوان (مع ان دول اللي كانوا بيقتلوا في الثوار قدام الاتحادية ) ويقولوا هينضموا لينا لما نتحرك ضد الجماعة (ازاي معرفش) والاكثر كوميديا عزيزي القارئ هو التناقض الشديد في كلامهم يهاجموهم وفي نفس الوقت يقولوا لا بد من التحالف معهم .
طبعاً الصنفين بالنسبة لي اي كلام وانا ضد ده وده لان ده وده اغبيا ورايحيين يتحالفوا مع الكلاب الرأسماليين سواء الليبراليين او اللي بياخدوا غطاء ديني لسياساتهم الرأسمالية وبيعترفوا ده وبيتشرفوا بده ومعرفش ازاي كل واحد منهم بيسمي نفسه يساري او بيسمي نفسه ماركسي واحياناً ماركسي لينيني وهو رايح يتحالف مع هذه الكائنات .
من ناحية تانية بقى بيعجبني اوي الحماس الشديد لدى بعض الشباب بخصوص 25 يناير 2013 لما بيقعدوا يقولوا هنعمل ونسوي مع اني ضد كلامهم ده .
واحد يسألني طب ليه ضد كلامهم , اقولك يا سيدي:
طبعاً انا بكره الاخوان وضد سلطتهم وضد فكرهم , ولكن لما نتكلم بجد نلاقي ان اللي نازليين يوم 25 يناير 2013 وبيقولوا هنعمل ثورة ضد الاخوان اولاً فاقديين لعوامل قيام الثورة وهي التنظيم الثوري اللي ليه نظرية ثورية قايم عليها وله قيادة وبرنامج ثورة . واحد يقولي طب ما 2011 مكنش في ده . اقوله ماهو علشان كدة فشل ومبقاش ثورة حقيقية .
الناس هتنزل يوم 25 يناير اللي جاي زي السنتين اللي فاتوا معندهمش رؤية هنعمل ايه بكرة بعد سقوط حكم الاخوان ومفيش بديل للي موجود حالياً وهم نازليين يسقطوه وبرضه بنفس الفكرة اللي مضيعانا (نتحرك وربنا يفرجها من عنده بعدين ) .
السنة اللي فاتت بصفتي كنت في الشارع طول يوم 25 يناير ( اللي الناس نزلت فيه تطالب بسقوط حكم العسكر دون وجود بديل وطالب اغلبهم بنقل السلطة للبرلمان اللي اغلبيته اخوان مع ان كان واضح ان الاخوان ضد الثورة اساساً وتبع المجلس العسكري) اقدر اقول انه كان لعب عيال مش اكتر من كدة .
طبعاً كلنا بنحب مصر ونتمنى ان يحصل فيها شئ كويس ولكن للاسف بقولها لكم بكل صراحة مصر مش هيحصل فيها حاجة كويسة واحنا بننزل بطريقة نتحرك وربنا يسهلها ويفرجها من عنده ونبقى نشوف هنتصرف ازاي .
الكلام ده هو اللي ضيعنا طول السنتين اللي فاتوا لازم نفهم احنا بنتحرك علشان ايه وبنعمل ايه وهنتحرك ازاي واخرنا فين ونفهم احنا نازليين نسقط مين ونفهم النظام هو ايه وكل حاجة عنه قبل ما ننزل نسقطه بدل ما كل مرة ننزل وفي النهاية الوجوه بس هي اللي بتتغير والسياسات بتفضل زي ما هي .
انا عن نفسي ناوي انزل يوم 25 ولكن ده برضوا ميمنعش اني عند رأيي ولو حصل حاجة واحنا مش منظمين وفاهميين احنا بنعمل ايه وليه هنضيع زي ما ضعنا قبل كدة .
وعلينا ان نفهم منذ الان انه لا ثورة كل فئات الشعب لان اللي هيعوزه العامل من الثورة غير اللي هيعوزه رجل الاعمال فلازم نفهم ولازم يبقى فيه بديل وكفاية تحركات عفوية .
اه ماشي نعمل مظاهرات ولكن منقولش هنعمل ثورة واحنا مش جاهزيين اننا نقوم بيها ولا فاهميين هتمشي ازاي .
وشكراً واسف اني طولت عليكم
علاء الشرقاوي